Skerfur

Almannarómur fer með umsýslu styrkja menningar- og viðskiptaráðuneytisins til innleiðingar og hagnýtingar íslenskrar máltækni.

Um styrkina gilda reglur nr. 1147/2024 frá menningar og viðskiptaráðherra sem birtust í Stjórnartíðindum 16. október 2024.

Til viðbótar þeim skilyrðum sem þar koma fram skal verkefnastjórn máltækniáætlunar skilgreina reglur úthlutunar og áherslur hverju sinni. Fyrir fyrstu úthlutun sjóðsins veturinn 2024-2025 eru þær eftirfarandi.

Skerfur - Innleiðingar- og hagnýtingarstyrkir máltækniáætlunar

Reglur um úthlutun 2024-2025

1. gr.

Styrkhæfi verkefna

Styrkir úr Skerf verða eingöngu veittir verkefnum sem styðja við meginmarkmið máltækniáætlana stjórnvalda um að gera íslensku gjaldgenga í stafrænum heimi og að stuðla að aukinni notkun á íslensku í tæknivörum og hugbúnaði.

Styrkjum er úthlutað til verkefna sem styðja við innleiðingu eða þróun hagnýtra endalausna sem byggja á máltækni. Verkefni sem miða eingöngu að þróun eða viðhaldi grunninnviða máltækni eru ekki styrkbær.

2. gr.

Umsóknir

Umsókn skal skilað með rafrænum hætti á netfangið [email protected] á þar til gerðu umsóknareyðublaði. Verkefnastjórn tekur ekki til umfjöllunar umsóknir sem berast eftir öðrum leiðum, né umsóknir sem berast utan auglýsts tímafrests. Umsókn skal innihalda eftirtalin gögn og upplýsingar eftir því sem við á:

1. Upplýsingar um umsækjanda eða umsækjendur.
2. Upplýsingar um aðra þátttakendur og samstarfsaðila.
3. Nafn verkefnisstjóra (þess sem annast samskipti við verkefnastjórn).
4. Nákvæm lýsing á verkefni, markmiðum þess og þýðingu fyrir umsækjanda og aðra.
5. Nákvæm lýsing á því hvernig verkefnið uppfyllir skilyrði í grein 1 um styrkhæfi verkefna.
6. Lýsing á því hvernig árangur verkefnisins verði metinn.
7. Tíma- og verkáætlun.
8. Fjárhagsáætlun, þar sem m.a. koma fram upplýsingar um áætlaðan kostnað, fjármögnun, hlutdeild annarra í kostnaði við verkefnið og styrki sem verkefnið hefur hlotið eða hefur sótt um. Mótframlag frá umsækjanda þarf að vera að lágmarki 50%.
9. Staðfest gögn frá samstarfsaðilum sem og önnur gögn til stuðnings umsókn.
10. Upplýsingar um kyn umsækjanda.
11. Upplýsingar um að umsækjandi sé ekki í vanskilum við innheimtumann ríkissjóðs.

3. gr.

Viðmið við úthlutun

Við mat á umsóknum er verkefnastjórn heimilt að leita umsagna fagaðila, gerist þess þörf. Auk skilyrða um styrkhæfi sem getið er 1. gr, munu eftirtalin atriði vega inn í mat á umsóknum og ákvörðun úthlutana.

Nýsköpun og nýnæmi

• Mikilvægi verkefnis fyrir hagnýtingu íslenskrar máltækni og/eða mikilvægi verkefnis fyrir innleiðingu nýrra vara, nýrrar þjónustu eða nýrra hugbúnaðarlausna sem nýta máltækni
• Mikilvægi verkefnis fyrir aukna verðmætasköpun/bætta þjónustu.

Ávinningur

• Gildi og ávinningur fyrir stöðu íslenskrar tungu í tækni
• Gildi og ávinningur fyrir ákveðna notendahópa og samstarfsaðila verkefnisins.
• Skalanleiki verkefnis, þ.e.a.s. hvernig umsækjandi sér það þróast, stækka og nýtast fleirum með það að markmiði að innleiðingin eða hagnýtingin bæti framboð tækni á íslensku og/eða auki þjónustu.

Faglegir þættir

• Gæði verkefnis, þ.m.t. hvort markmið og skipulag verkefnis séu skýr, hvernig markmiðum verkefnis verði náð og hvernig árangur verði metinn.
• Faglegur bakgrunnur umsækjanda og annarra þátttakenda.
• Fjárhagslegur grundvöllur verkefnis og önnur fjármögnun.
• Samstarf sem er mikilvægt fyrir verkefnið.

4. gr.

Úthlutun og skilmálar.

Verkefnastjórn máltækniáætlunar 2 hefur það hlutverk að meta umsóknir í samræmi við áherslur sem fram koma í almennum úthlutunarreglum menningar- og viðskiptaráðuneytis og í ofantöldum reglum um úthlutun 2024-2025. Verkefnastjórn gerir tillögur til ráðherra um úthlutun og ráðstöfun fjár til verkefna.

Tilkynna skal öllum umsækjendum um afgreiðslu viðkomandi umsóknar. Við móttöku á styrk ábyrgist styrkþegi að honum verði einungis varið til þess verkefnis sem getið er um í umsókn. Jafnframt skuldbindur hann sig til að skila greinargerð um árangur verkefnisins og fjárhagsuppgjöri skv. samningi. Styrkþegi skal auk þess hlíta öðrum þeim skilmálum sem fram koma í reglum þessum eða eru tilgreindir sérstaklega í samningi.

Um upplýsingagjöf og uppgjör segir í 7. gr. úthlutunarreglna ráðuneytisins.

Styrkjum er úthlutað til eins árs í senn. Nýti styrkþegi ekki styrk innan þess tíma fellur styrkurinn niður, nema sérstaklega sé sótt um frestun á ráðstöfun hans. Umsókn þess efnis skal vera skrifleg og rökstudd.

Styrkþegi má ekki vera í vanskilum við innheimtumann ríkissjóðs og skilar stöðuyfirliti þar um og má ekki vera á vanskilaskrá Creditinfo.
Þegar ákvörðun hefur verið tekin um úthlutun birta ráðuneytið og Almannarómur nöfn styrkþega, heiti verkefnis og upphæð styrks á vef sínum.

Samþykkt af verkefnastjórn máltækniáætlunar

Reykjavík, 26.11.24

Reglur ráðuneytisins má finna á eftirfarandi hlekk:

Reglur um úthlutun styrkja á vegum menningar- og viðskiptaráðherra árin 2024-2026 til innleiðingar og hagnýtingar íslenskrar máltækni

Reglurnar voru birtar í Stjórnartíðindum þann 16. október 2026. Mikilvægt er að umsækjendur um styrkinn kynni sér þessar reglur vel og tryggi að verkefni sem sótt er um falli að þeim.