Almannarómur vinnur stöðugt að því að gera íslensku nothæfa í öllum helstu stafrænu lausnum sem notaðar eru í íslensku samfélagi. Stór hluti af þeirri vinnu snýr að því að eiga í samskiptum og samstarfi við erlend fyrirtæki sem þróa mikið notaðar lausnir um að gera þær virkar á íslensku
Flestar stærstu tæknilausnir heims eru einmitt ekki þróaðar með íslensku í forgrunni. Þess vegna þarf Almannarómur stöðugt að fylgjast með þróuninni, prófa hvernig lausnir virki á íslensku og oft að þrýsta á úrbætur til að tryggja að íslenskir notenur sitji ekki eftir.
Staða íslensku í tæknilausnum hefur batnað verulega á undanförnum árum. Með markvissri vinnu og hagsmunagæslu hefur tekist að koma íslensku inn í fjölda þeirra lausna sem skipta mestu máli í daglegu lífi fólks og fyrirtækja og almennt stendur hún ágætlega í helstu tæknikerfum.
Hér í töflunni að neðan er dregin saman staða íslensku innan lausna stærstu tæknifyrirtækjanna og lausnunum gefin einkunn á bilinu 1 til 5 eftir því hversu nothæfar þær eru á íslensku.
Skýrasta dæmið um hverju markviss hagsmunagæsla getur skilað er samstarf Íslands og OpenAI. Í kjölfar fyrstu sendiferðar máltækni 2022 opnaðist beint samtal við fyrirtækið sem leiddi til samstarfs sem vakti alþjóðlega athygli og setti Ísland á kortið í þróun gervigreindar.
Íslenska varð þannig fyrsta tungumálið utan ensku sem var innleitt með markvissum hætti í Chat GPT-4.
Íslenska fyrirtækið Miðeind gegndi þar lykilhlutverki með samstarfi við OpenAI sem fólst í því að veita gögn til þjálfunar líkansins, veita endurgjöf á gæðum þess og almennu mati á málskilningi og málmyndun þess
