Frétt
27. JÚLÍ 2026
Opið fyrir umsóknir til 5. ágúst 2026 í almannaromur@almannaromur.is
Almannarómur ætlar að bjóða þremur efnilegum einstaklingum í máltækni og gervigreind að sækja MALT Summer School, fjögurra daga evrópskan sumarskóla um aðferðir í máltækni, sem haldinn verður í Château de Villers-Cotterêts, rétt utan Parísar, í Frakklandi dagana 25. til 28. ágúst. Almannarómur greiðir allan kostnað fyrir viðkomandi; þátttökugjald, ferðir og gistingu. Umsóknarfrestur er til 5. ágúst.
Skólinn er haldinn af ALT-EDIC, Evrópusamstarfi í máltækni, og Tækniháskólanum í Eindhoven með stuðningi frá Evrópuverkefninu LLMs4EU. Umfjöllunarefni skólans verða gögn og matsaðferðir fyrir mállíkön, tvö af stærstu úrlausnarefnum máltækninnar í dag. Þar koma saman doktorsnemar, ungt rannsóknarfólk og sérfræðingar úr atvinnulífinu víðs vegar að úr Evrópu.
Fyrirlesarar skólans koma úr fremstu röð í evrópskri máltækni og gervigreind. Yfirlit yfir þá má finna á vef sumarskólans.
Markmið Almannaróms með boðinu er að styrkja íslenskt máltæknifólk til að sækja sér þekkingu og byggja upp tengsl í evrópska máltæknisamfélaginu. Ísland hefur á undanförnum árum skipað sér í fremstu röð þegar kemur að uppbyggingu gagna og innviða fyrir minni tungumál og með þátttöku í viðburðum sem þessum tryggjum við að við höldum áfram að deila okkar reynslu og læra af öðrum.
Fyrir hverja er námskeiðið?
Skólinn er ætlaður nemum eða ungu fólki á vinnumarkaði sem starfar á sviði máltækni. Öllum stendur til boða að sækja um sem starfa við eða stunda nám í máltækni eða gervigreind á Íslandi, hvort sem er í háskóla, hjá rannsóknarstofnun eða fyrirtæki.
Hvernig sæki ég um?
Umsóknin er einföld. Sendu okkur stutta kynningu á þér þar sem fram kemur:
→
Hver þú ert og hvar þú starfar eða stundar nám.
→
Á hvaða stigi menntunar í máltækni eða skyldum greinum þú ert, eða hvaða námi þú hefur lokið. Ef þú starfar hjá fyrirtæki þá biðjum við um helstu upplýsingar um verkefni þín.
→
Helstu áhugasvið þín innan máltækninnar.
→
Hvernig skólinn mun nýtast þér.
Umsóknin skal send á almannaromur@almannaromur.is fyrir 5. ágúst 2026. Valið verður úr umsóknum með það fyrir augum að hópurinn endurspegli breidd íslensks máltæknisamfélags sem best.
Nánari upplýsingar um skólann og dagskrá hans má finna á vef sumarskólans.
